O Concello de Boiro celebrou este xoves día 30 o pleno ordinario da Corporación correspondente ao mes de abril. A sesión, que como de costume pode visualizarse na canle municipal de Youtube, saldouse con acordos moi relevantes, como a aprobación, cos votos a favor do equipo de Goberno, dos novos Orzamentos, que foron avanzados polo Executivo os días pasados e que ascenden a máis de 19 millóns de euros.
As contas inclúen entre outras cousas unha partida para pavimentados e arranxo de vías en varios lugares de todo o termo municipal; investimento na mellora da rede de saneamento e abastecemento municipal; unha partida para o arranxo de centros sociais; investimentos en mellora das infraestruturas deportivas; así como mellora de parques infantís entre outras.
Tamén foi aprobada unha moción do BNG para a posta a punto do Complexo Deportivo de Vista Alegre e o Pavillón de Valiño.
Igualmente, aprobouse por unanimidade a proposta de Boiro Novo para realizar melloras de seguridade relevantes en Valmaior, Treites e O Louriño, en Cespón, e para mellorar a contorna da Fonte do Lorcho, en Cabo de Cruz.
Votacións da sesión
1. Aprobación da acta da sesión ordinaria do 26 de marzo de 2026 – aprobación con 11 votos a favor (PSOE, BNG e Boiro Novo) e 6 abstencións (PP e 1 concelleiro do PSOE).
2. Elaboración e aprobación do Orzamento – aprobación con 9 votos a favor (PSOE) e 8 votos en contra (PP, BNG e Boiro Novo).
3. Aprobación do Proxecto de consolidación de edificacións de lagar, vivenda e as cortes no entorno patrimonial do Pazo de Goiáns – aprobación por unanimidade (17 votos a favor).
4. Moción do grupo municipal do BNG relativa ao campo de Vista Alegre – aprobación por unanimidade (17 votos a favor).
5. Moción do grupo municipal de Boiro Novo/mixto para acometer melloras na zona de Valmaior, Treites e O Louriño – aprobación por unanimidade (17 votos a favor).
6. Moción do grupo municipal de Boiro Novo/mixto para solicitar o arranxo da Fonte do Lorcho e a mellora e posta en valor da praza e zonas anexas – aprobación por unanimidade (17 votos a favor).
7. Cargos Públicos (Dedicacións, Retribucións e Indemnizacións – aprobación con 9 votos a favor (PSOE), 3 votos en contra (BNG e Boiro Novo) e 5 abstencións (PP).
