A agrupación Boiro Novo, a través do concelleiro Xurxo Triñanes Hermo, presentou para a súa aprobación no pleno da Corporación municipal unha moción destinada a acometer melloras nas zonas de Valmaior, Treites e O Louriño. Explican que “na parroquia de Cespón, a zona que comprende as ditas aldeas e arredores mantén unha situación de abandono histórico, con estradas estreitas e con gabias moi profundas nas que non caben dous vehículos simultaneamente e nas que camiñar é un perigo para os peóns; ao que se engade unha moi baixa frecuencia nos traballos de roza e limpeza das pistas coa consecuente diminución da visibilidade; a falta de sinalización tanto vertical como horizontal e danos nos sinais existentes; a ausencia marquesiñas o que provoca que os rapaces non poidan ter acubillo en caso de mal tempo; o alumeado insuficiente ou directamente ausente na zona que une Valmaior con Treites; un pozo de bombeo de Treites inoperativo; ou contedores rotos, sucios e inexistentes no caso de varias fraccións de lixo reciclábel”. Ao devandito, sinalan, únese o deterioro e falta de equipamentos deportivos nas pistas deportivas de Treites.
Dende Boiro Novo engaden que “estamos a falar dunha zona con preto de 200 veciños que precisa dun plan de mellora integral, mais aló de parches puntuais que non solucionan o problema de abandono de fondo que veñen arrastrando este núcleos de poboación. Entendemos que todos os veciños que contribúen cos seus impostos ao sostemento das arcas municipais merecen a lo menos ter uns servizos básicos mínimos, dignos e axeitados vivan no lugar que vivan do noso concello”.
Polo anteriormente exposto, solicitan o voto favorábel para a elaboración “dun plan de mellora integral na zona dos núcleos de Valmaior, Treites, Louriño e arredores desglosado a lo menos nas seguintes actuacións: aumentar o ancho das calzadas dotándoas con zona separada para peóns aproveitando onde sexa posíbel o espazo das cunetas existentes e instalado as tubaxes e canalizacións de pluviais necesarias; e dotar de sinalización tanto vertical como horizontal ás estradas e repoñer a que actualmente está danada”.
Tamén reclaman a reposición, mantemento e aumento dos distintos tipos de contedores de lixo e “cumprir así no seu caso do acordo plenario 1086/2026 proposto por Boiro Novo, para aumentar e mellorar o número de contedores de reciclaxe no rural do concello”.
Ademais, piden dotar de marquesiñas adecuadas e accesíbeis ás 3 paradas oficiais existentes na zona; a mellora xeral do alumeado e particularmente instalar luminarias na pista que une Valmaior con Treites; e dotar de porterías, canastras e outros equipamentos deportivos ás pistas deportivas de Treites, así como reacondicionar as mesmas para a práctica deportiva.
