A agrupación Boiro Novo compartiu un comunicado no que solicitou o arranxo das lousas rotas da fonte do Lorcho e propón unha actuación integral en toda esa praza. A proposta, feita a través do concelleiro Xurxo Triñanes, pon o foco na reparación urxente das lousas rotas e levantadas na dita contorna de Cabo de Cruz e no “perigo que supoñen para a xente que camiña por esa praza”. Sinalan tamén que se trata dunha demanda veciñal compartida co grupo, unha demanda na a xente de Cabo mostra a súa preocupación polo risco de caídas e tropezos por culpa do estado das pedras.
“Sen embargo”, din, “a proposta vai mais alá dun simple parche, ca que cremos firmemente que hai que apostar por poñer en valor os núcleos tradicionais como Cabo de Cruz e esta praza merece unha actuación acorde na que se substitúa o piche e o cemento por un enlousado en toda a praza”. Así mesmo solicitan “que se arranxe e poña en valor o lavadoiro que hai próximo a esta praza, na Aldea de Arriba, así coma o seu entorno”.
