A Asociación Galega para a Axuda das Persoas con Demencia tipo Alzhéimer (AGADEA) conmemorou este 21 de setembro, no Hospital Clínico Universitario de Santiago (CHUS), o Día Mundial do Alzheimer. Fíxoo cunha mesa informativa e un encontro no que participaron a presidenta da entidade, Isabel Gey Pérez; o xerente da Área Sanitaria de Santiago de Compostela e Barbanza, Ángel Facio Villanueva; e profesionais sanitarios vinculados á Neuroloxía.
A actividade serviu para achegar información á cidadanía e poñer o foco nos principais retos actuais: avanzar no diagnóstico precoz, reforzar a coordinación entre os ámbitos sanitario e social, garantir recursos de proximidade e acompañar tanto ás persoas diagnosticadas como ás súas familias.
A Federación Alzhéimer Galicia (FAGAL) estima que preto de 70.500 persoas viven en Galicia con Alzhéimer ou outro tipo de demencia, mentres que a Xunta de Galicia sitúa en máis de 5.000 os novos diagnósticos anuais.
“Estas cifras cobran especial relevancia nunha comunidade cunha poboación fortemente envellecida, na que o 25,4 % das persoas supera os 65 anos”, informou AGADEA.
AGADEA sinalou tamén que o alzhéimer representa entre o 60 % e o 80 % dos casos de demencia. A esta realidade súmase o elevado infradiagnóstico: estímase que arredor do 70 % dos casos de demencia poderían estar sen diagnosticar. Ademais, o impacto da enfermidade esténdese directamente ás familias, xa que o 85 % dos coidados recaen nun familiar próximo.
AGADEA aproveitou a celebración para defender “unha resposta integral na que a innovación terapéutica vaia acompañada de capacidade diagnóstica, coordinación sociosanitaria, recursos especializados e de proximidade, apoio ás persoas coidadoras e respecto á autonomía e á dignidade das persoas diagnosticadas”.
Con motivo do Día Mundial do Alzhéimer, esta noite a Televisión de Galicia (TVG) emitirá o documental Un Camiño de Lembranzas – O Camiño de Muxía e Fisterra, que recolle o proxecto desenvolvido por AGADEA ao longo de diferentes etapas do Camiño a Muxía e Fisterra e co-financiado pola Xunta de Galicia no marco do programa O teu Xacobeo.
