Estes días son días de cancelacións e aprazamentos na comarca, unha medida extensíbel a todos os concellos e que afectan a actividades que impliquen concentracións de persoas, xa non só grandes, senón de calquera dimensión. Entre os eventos previstos que veñen de ser adiados para máis adiante, para cando a situación derivada da pandemia de COVID-19 se normalice, atópanse algúns que vimos anunciando dende hai semanas, como por exemplo o acto inaugural da nova exposición d artista local Manuel Ayaso que tiña programado o Concello de Ribeira para este venres 13.
Tamén se apraza para máis adiante o espectáculo de ópera Madama Butterfly no Auditorio de Rianxo, previsto para este sábado 14, ou o monólogo que ía ofrecer o venres 13 a humorista Valeria Ros na Pousada da Galiza Imaxinaria de Boiro, do que falamos onte en O Barbanza antes do anuncio de aprazamento.
Igualmente, suspendeuse o mercadiño dos sábados en Ribeira, ou a homenaxe aos maiores que tiña programado realizar a Asociación de Amas de Casa de Ribeira.
A maiores destas actividades, tamén cae o xantar da terceira idade que ía ter lugar en Lousame o domingo.