Este venres 13 de marzo A Pousada da Galiza Imaxinaria ponse novamente en clave de humor e achéganos unha nova entrega do seu ciclo de monólogos. Desta volta, a retranca en carreira libre, sen obstáculos, virá da man da humorista e monologuista Valeria Ros, a partir das 23.00 horas no local de Boiro. O nome baixo o que se presenta o espectáculo, Sen filtro, fala por si só do menú que contén: un menú de historias sen censura, fluíndo libres e botando man da improvisación e mesmo da interacción co público. Segundo se fai saber dende a web de A Pousada, Valeria Ros detalla neste monólogo as súas obsesións, observacións e múltiples fracasos, incluído un achegamento a algunhas das súas máis célebres meteduras de zoca recentes.
Valeria Ros, para quen non o saiba, presenta cada semana o programa radiofónico La lengua moderna xunto ao tamén cómico Quequé. Ao mesmo tempo é colaboradora dende 2017 do programa A vivir que son dos días, presentado por Javier del Pino. Estes traballos compaxínaos con Zapeando, programa de TV no que ten unha sección de seu, semanal, chamada Lo que pides y lo que te llega.
