O Entroido de Boiro vén este ano cun amplo abano de actividades para veciños e visitantes de todas as idades: un programa no que unificaron forzas o Concello, as asociacións e os colectivos locais co obxectivo común de conseguir un febreiro completo de actividades choqueiras, humor, creatividade e implicación veciñal.
O programa oficial comeza este 21 de febreiro co Concilio de Abadesas, unha actividade que comparte todos os elementos devanditos e algunha sorpresa máis. Está previsto para as 19.00 horas no Centro Cultural e Deportivo de Boiro. A ruada acompañarase de música gregoriana a cargo de Vai de Baile.
Segundo explica o Concello, trátase dunha ruada aberta aberta á participación da veciñanza (todo o mundo pode participar, co único requisito de levar como complemento da vestimenta elementos relixiosos, ou sexa “catholic outfit e ganas de bailar”). O desfile, logo dunha serie de paradas estratéxicas, rematará na Pousada da Galicia Imaxinaria.
