A Xunta de Galicia concedeu á praza de abastos de Boiro o selo de Mercado Excelente, un distintivo que identifica aquelas instalacións que destacan pola súa modernidade, innovación e dinamización, sen perder a súa autenticidade, tradición e trato personalizado. Así o reflicte a resolución autonómica trasladada ao Concello de Boiro, o que converte o Mercado Municipal deste municipio no oitavo de Galicia en contar con este selo que tamén teñen as prazas de Tomiño, Vilagarcía de Arousa, Pontedeume, Carballo, Ribeira, Ponteareas e Tui.
A instalación do distintivo realizarase en próximos días e, deste xeito, avánzase no obxectivo de acadar os 25 espazos con esta distinción en 2030, aspecto recollido no Plan estratéxico do comercio de Galicia 2025-2030.
En concreto, o Mercado de Boiro conta con preto de medio cento de postos de venda cunha ampla variedade de produtos frescos, de proximidade e óptima calidade, como peixe, marisco, carne, froitas e verduras. Tamén de conservas, conxelados e flores, ou postos de arranxos de costura e hostalería.
A Xunta explicou que esta distinción é “froito dun traballo conxunto entre as administracións autonómica e local no marco da aposta por un modelo de excelencia que sirva como referente de calidade, innovación e compromiso coa cidadanía”. Un cometido que inclúe o Plan estratéxico do comercio de Galicia 2025-2030 para consolidar as prazas de abastos como puntos neurálxicos da comercialización de produtos frescos de proximidade, ademais de como centros de actividades complementarias que inciden de xeito decidido na dinamización das vilas e cidades galegas.
