A alcaldesa de Ribeira, María Sampedro, participou hoxe na presentación do Informe de Conxuntura Económica (ICE) 2025 xunto ao presidente do Club Financiero de Santiago (CFS), Roberto Pereira, e a catedrática de Economía da Universidade de Santiago de Compostela (USC), María Bastida; un documento que conta con datos actualizados do municipio, elaborado polo grupo de investigación PRAXIS da USC en colaboración co CFS.
Na súa intervención, a rexedora salientou “o peso da localidade na cadea mar-industria ao contar cun dos principais portos de baixura de toda Europa con tódolos postos de traballo que se xeran de maneira directa e indirecta, ademais de concentrar gran número de fábricas para a transformación dos recursos”.
En consecuencia, Sampedro apuntou que “Ribeira eríxese como un municipio estratéxico a nivel económico para toda Galicia no sector marítimo”, se ben apuntou como un dos grandes retos a remuda xeracional.
O informe conclúe que Ribeira “conta cunha base produtiva moi sólida, cunha especialización industrial e marítima superior á media galega, pero tamén cunha marxe importante para conseguir que esa actividade se traduza en maiores niveis de renda, emprego cualificado e benestar para a súa poboación” . Así, a industria representa o 18,7% das afiliacións á Seguridade Social no municipio, fronte ao 13,2% do conxunto de Galicia. Ribeira conta, ademais, con máis de 1.900 empresas.
Novas oportunidades
A diagnose propón “aproveitar a especialización marítima e industrial de Ribeira para desenvolver novas actividades e reforzar as capacidades que xa existen”. Para iso, identifícanse seis liñas de actuación: desenvolver produtos e marcas de maior valor, reforzar a tecnoloxía e a I+D aplicada, impulsar a cooperación empresarial, dispor de solo adecuado, mellorar os tempos administrativos e reforzar a formación, emprego e vivenda. A intelixencia artificial atravesa estas liñas como ferramenta para que as pequenas empresas gañen escala.
Lémbrase tamén que o municipio xa conta con iniciativas que apuntan nesta dirección: a liña SOLO de FRINSA, orientada a novos segmentos de alimentación; Ribeira Alga Circular, que explora novas aplicacións das algas, e o Fishing Lab, que achegou á lonxa solucións de sensórica e monitoraxe das artes de pesca.
Tamén se identifica que “sería positivo o futuro parque empresarial de Ribeira, que ocupará 260.000 metros cadrados e que, como indicou a primeira edil, prevese que a Xunta de Galicia o saque a licitación a finais de ano”.
Outras oportunidades identificadas son o turismo de natureza, a gastronomía e o patrimonio mariñeiro, así como a bioeconomía, os novos derivados do mar e a tecnoloxía industrial. Por outro lado, a actividade eólica do Barbanza e a transición enerxética abren oportunidades en servizos auxiliares, mantemento, enxeñería e formación, incluso con perspectivas á eólica mariña. Así mesmo, o talento e as condicións para atraer e reter poboación cualificada son un reto para Ribeira.
A primeira edil manifestou que “quedan cousas por facer para adaptarnos a un horizonte en constante evolución, si, pero é un alivio constatar que imos polo bo camiño. Porque hoxe, máis ca nunca, podemos confirmar que o mar é pasado, presente e tamén garantía
de futuro”.
Pola súa banda, Roberto Pereira destacou a importancia de achegar o coñecemento económico aos municipios e poñer a disposición do tecido empresarial e das administracións ferramentas que permitan identificar os seus principais retos e oportunidades.
Sinalou, así mesmo, o compromiso do Club Financeiro de Santiago coa análise da realidade económica galega e coa promoción de espazos de diálogo e colaboración entre empresas.
