O Ciclo de Cine Mestre Mateo, iniciativa itinerante da Academia Galega do Audiovisual para levar o mellor cinema galego aos concellos, vai proxectar en Boiro esta fin de semana un dos mellores filmes recentes da nosa industria: o semi-documental Deuses de Pedra, dirixido polo ourensán Iván Castiñeiras. Será este domingo 8 de novembro ás 19.00 horas, no Centro Social de Boiro.
Deuses de Pedra transcorre no norte de Portugal, preto de Galicia, onde transcorre (agora) o que aconteceu décadas antes ao outro lado da raia (en Galicia): o devalo do rural e o abandono dun xeito de vivir e convivir que poñía fin a séculos de historia. Un proceso materializado na emigración da mocidade, na falta de oportunidades, na interrupción da transmisión cultural, no abandono de usos e costumes (agrícolas, sociais, culturais) e, sobre todo, no despoboamento.
O filme cóntanos a historia de Mariana, unha nena de catro anos que descobre o mundo a través dos ensinos da súa mestra, nunha das últimas escolas rurais na fronteira entre Galicia e Portugal. Os contos infantís mestúranse coas lendas e historias que aínda habitan o lugar. Entre relato e relato Mariana crece e aos seus dezasete anos confróntase a unha importante decisión, partir da súa aldea, separarse da súa nai para ir estudar ao estranxeiro.
