O Entroido de Boiro vén este ano cun amplo abano de actividades variadas para veciños e visitantes de todas as idades. Para poñer o foco nesta vertente diversa do Febreiro Choqueiro boirense, o Concello e unha manchea de asociacións e colectivos locais presentaron este mércores 12 a axenda cultural e festeira que abranguerá practicamente todo o mes de febreiro (e parte do de marzo) e que terá varios centros neurálxicos de actividade, entre os que se conta o Centro Social. Haberá música, ruadas, exaltacións gastronómicas, concursos e, como non, as tradicionais despedidas ao Felipiño de Escarabote e máis ao Óso de Abanqueiro.
Á presentación do programa asistiron a concelleira de Cultura, María Outeiral, o técnico de Cultura, Alberto García, Alfonso Alcalde, da Asociación Comisión de Festas da Boliña, Lucia Pérez, da asociación que organiza o Enterro do Felipiño en Escarabote e José Blanco, da organización do Enterro do Óso en Abanqueiro.
O programa de actividades comeza o 21 de febreiro co Concilio de Abadesas, unha ruada aberta aberta á participación da veciñanza (todo o mundo pode participar, co único requisito de levar como complemento da vestimenta elementos relixiosos). O desfile, no que participa a charanga Vai de Baile, comeza as 19.00 horas no Centro Cultural de Boiro e remata na Pousada da Galicia Imaxinaria.
O sábado día 22, a Asociación Comisión de Festas da Boliña organiza o seu tradicional Entroido, coa Festa da Orella (que vai xa pola súa edición número 13), maquillaxe infantil e música. Será no campo de Revelar, na Boliña, a partir das 19.00 horas.
O domingo 23 o Concello promove un desfile infantil pola rúa peonil e haberá tamén animación para os mais cativos e actuación de Magín Blanco na praza da Mancomunidade.
O martes 25 celebrarase o xa tradicional desfile e concurso de disfraces e carrozas, no que se van repartir 3.000 euros en premios. O desfile este ano sairá un pouco antes, ás 17.00 horas, e farao da praza do Concello.
A programación de entroido remata a fin de semana seguinte, co Domingo de Enterros, que será o 1 de marzo. Como novidade, este ano haberá un tren que percorra o municipio para levar a xente duns enterros a outros e no que irá a charanga Faíscas da Pontraga. Sairá de Boiro pola mañá e percorrerá Abanqueiro, Escarabote e Boiro.
Programación
Venres 21 de febreiro
19.00h – Concilio de Abadesas pola rúa peonil
19.00h – Festa de Entroido da ANPA de Escarabote no Centro Social de Escarabote
Sábado 22 de febreiro
19.00h – Entroido da Boliña no Campo de Revelar
Domingo 23 de febreiro
16.30h – Desfile infantil pola rua peonil
Luns 24 de febreiro
10.30h – Obradoiro de Repostaría e Manualidades de Entroido no Centro Social de Cabo de Cruz
Martes 25 de febreiro
17.00h – desfile e concurso de disfraces e carrozas
Domingo 1 de marzo
*Haberá un tren co grupo Faíscas da Pontagra que percorra o municipio para ir duns enterros a outros
12.00h – Enterro da Cunca en Praia Xardin
12.00h – Desfile da Asociación Cul. Ent. Crucense en Cabo de Cruz
12.00h – Foliada de Entroido A.C. Pedra da Aroña no porto de Escarabote
16.30h – Enterro do Óso en Abanqueiro
17.00h – Enterro do Felipiño no porto de Escarabote
20.30h – Enterro da Sardiña no Centro Social de Boiro
