O Concello de Boiro beneficiarase da subvención do PEL-Concellos da Deputación Provincial da Coruña para a contratación de persoal. Un total de 103.996,35 euros serán empregados para empregar a peóns de diferentes servizos.
A finalidade coa que se pon en marcha esta axuda é a de fomentar o emprego mediante a contratación de persoal en situación de exclusión laboral, así como contribuír á actividade económica, á fixación de poboación nos concellos e ao crecemento sostible dos mesmos. No caso do Concello de Boiro, os peóns estarán ligados a tarefas de mellora na rede de sumidoiro, en accesos a núcleos de poboación e pavimentación das vías públicas.
O proceso de selección abrirase nas vindeiras semanas, e tódolos interesados deberán atoparse nalgunha das seguintes situacións de exclusión laboral: ser maior de 45 anos, ser persoas desempregadas de longa duración, discapacidade, vítimas de violencia, drogodependencia… O número total de horas previstas de traballo para a contratación é de 7.835 horas. As bases e o prazo para a presentación de solicitudes estará dispoñible na páxina web municipal, www.boiro.gal.
