O 25N en Rianxo, Día Internacional pola Eliminación da Violencia contra as Mulleres, vai ser unha xornada de sensibilización pola igualdade e de loita contra as agresións machistas, da man da Concellería de Igualdade. O propio martes 25N, durante toda a xornada haberá un Tendal da vergoña no Campo de Arriba de Rianxo no que calquera persoa pode pendurar as violencias que a diario sofren as mulleres só polo feito de selo.
Ás 18.00 horas do día 25, no Auditorio de Rianxo, proxectarase o documental O próximo baile será contigo, unha ollada en primeira persoa á forza do apoio mutuo entre as mulleres, á loita fronte á violencia institucional e á dor da ausencia. Ao remate da proxección haberá un coloquio coas protagonistas.
Ás 20.00 horas celebrarase a lectura do manifesto. Ademais, pandeireteiras rianxeiras cantarán xuntas Sen medo. Prevese que o acto se celebre no Campo de Arriba, mais en caso de choiva trasladarase ao Auditorio de Rianxo.
Ademais, a Casa Consistorial iluminarase de violeta durante toda a xornada.
Do 24 ao 30 de novembro estarán expostas as pancartas de Irmandiñas Púrpuras no segundo andar do Auditorio de Rianxo.
Tamén están colgadas na balaustrada do Pavillón Municipal José Manuel Abuín “Chema” as bufandas contra a violencia elaboradas por Ondiñas Mainas.
