O Concello de Boiro recibiu na mañá deste mércores 3 de abril a visita do alumnado de 2º e 3º de primaria do CEIP Santa Baia. Durante a súa estadía no Consistorio puideron coñecer o funcionamento dos distintos servizos municipais e facerlle as súas preguntas e peticións ao concelleiro de Administración Xeral, Raúl Treus, e outros membros do Goberno local.
No transcurso da visita, o alumnado tamén tivo oportunidade de coñecer o salón de plenos, como se constitúe a Corporación local ou o funcionamento dos distintos departamentos e servizos municipais e como é o traballo diario da Administración local. Ademais, os grupos tiveron oportunidade de simular unha corporación e celebrar un simulacro de pleno.
Estas visitas están incluídas na formación que o propio alumnado recibe nas aulas para coñecer o funcionamento dos concellos e, durante a visita, tiveron oportunidade de formular as súas dúbidas ou preguntas sobre o municipio, os servizos públicos e tamén o traballo diario dos concelleiros e concelleiras.
