Noia impulsa esta tempada unha nova edición do certame Vai de Tapas, que ten aberto xa o seu prazo de inscrición para os establecementos de hostalería locais que queiran participar na iniciativa.
Os días 6, 7 e 8 de novembro volve unha cita para “dar a coñecer a túa cociña e animar a veciñanza e visitantes a saír de tapas pola vila noiesa”.
Serviranse tapas a 3 €, de elaboración libre e preferentemente con produtos locais.
O miolo do programa de actividades é un concurso para elixir a mellor tapa, coa votación do público e dun xurado.
Haberá sorteos entre as persoas participantes e promoveranse os establecementos en prensa e redes sociais.
Ademais, o Vai de Tapas terá este ano un impulso especial ao coincidir coa actividade de dinamización comercial e descontos MercaNaVila, o Festival de Curtametraxes de Noia e o Magosto.
Os establecementos que queiran participar en Vai de Tapas poden inscribirse en liña.
O Vai de Tapas de Noia está organizado polo Concello de Noia, contando coa colaboración activa da asociación de comerciantes Noia Histórica e o sector hostaleiro local.
