A implantación do estándar DVB-T2 na Televisión Dixital Terrestre (TDT) rematou a noite pasada, polo que os usuarios deberán resintonizar os seus televisores a partir das 8.00 horas do xoves 5 de novembro para recibir en ultra alta definición (UHD) as principais canles de ámbito estatal.
Quen non realice esta operación poderá seguir vendo os contidos en alta definición (HD), como ata agora, pero podería atoparse con cambios na posición dalgunhas canles ou mesmo deixar de recibir algunhas delas, dependendo da configuración técnica dos centros emisores e dos televisores. Entre as canles que poderían verse afectadas figuran Clan, DKiss, A3Series, BeMad e Boing, ademais de La Séptima, a nova canle que comezará as súas emisións o propio 5 de novembro.
A recepción das emisións en UHD require tamén que o televisor sexa compatíbel con esta tecnoloxía. Os aparellos adquiridos despois de marzo de 2025 xa incorporan esta compatibilidade, mentres que nos modelos anteriores pode comprobarse a través do menú de configuración ou das especificacións técnicas. A presenza de referencias como 4K, UHD ou unha resolución de 3840 x 2160 píxeles confirma que o dispositivo está preparado para recibir estes contidos.
Os televisores que non admitan UHD seguirán recibindo a programación en HD, polo que a transición non implica que deixen de funcionar nin que sexa imprescindíbel substituílos para continuar vendo a TDT.
A adopción de DVB-T2 achega unha maior eficiencia na transmisión e permite ofrecer mellor calidade de imaxe e son. A maioría dos países da Unión Europea xa emprega este estándar, que facilita que a televisión terrestre poida competir en condicións máis favorábeis cos servizos audiovisuais distribuídos por satélite ou a través de Internet, onde as emisións en UHD están máis estendidas.
O cambio forma parte do Plan Técnico Nacional da Televisión Dixital Terrestre, aprobado en marzo de 2025. Unha vez que o parque de televisores estea suficientemente adaptado, abordarase unha segunda fase da evolución tecnolóxica, coa extensión da calidade UHD a todas as canles da TDT, tanto estatais como autonómicas e locais.
