Este martes 20 de outubro a Asociación Saúde Mental A Creba, entidade inclusiva do Barbanza, recibiu o cheque do recadado na II Andaina pola Saúde Mental celebrada o sábado 10 de outubro en Ribeira, polo Día Mundial da Saúde Mental.
Álex Vidal, concelleiro de Deportes, Innovación e novas Tecnoloxías do Concello de Ribeira e Abraham Benítez, voluntario e impulsor da Andaina, foron recibidos para a entrega polas usuarias da entidade.
Nesta edición da camiñada solidaria recadáronse un total de 755,05€ e participaron, entre o dorsal cero e as persoas que acudiron á cita, 140 persoas, case o dobre que o ano anterior.
Dende A Creba valoran e agradecen a implicación de tantas persoas nesta iniciativa, destacando “a importancia de sentirse parte da comunidade e normalizar a participación de persoas con problemas de saúde mental en actividades fora do centro”.
Engaden que con “este tipo de encontros búscase reivindicar os vínculos naturais e romper o estigma que pode chegar a invalidar ás persoas con estas dificultades, obstaculizando o seu desenvolvemento persoal e o camiño a unha vida independente”.
Tamén, como expresaba o Manifesto do Comité Pro Saúde Mental en Primeira persoa e a Rede Estatal de Mulleres da Confederación Salud Mental España, que foi lido ao final da Andaina por persoas voluntarias e usuarias, “concienciar á poboación para que un diagnóstico non sexa o obstáculo para unha vida mellor, e que a vida non sexa un simple diagnóstico”.
