A Policía Local de Boiro levou a cabo nas últimas semanas unha campaña de especial vixilancia sobre a tenencia de mascotas que tivo como resultado 46 identificacións e ata 8 sancións.
O obxectivo desta campaña informativa e de vixilancia foi promover o uso obrigatorio de microchip, fomentar a recollida de excrementos en espazos públicos e asegurar que as mascotas paseen con correa. As sancións cometidas foron, principalmente, por este último suposto de non levar aos cans correctamente atados en zonas comúns.
O Concello de Boiro conta cun censo duns 2.500 cans polo que, insiste, “é necesario lograr un equilibrio para a convivencia e posto que, o non coidado dos animais e o abandono está a resultar un problema crecente para as administracións”.
Neste ano 2025 recolléronse un total de 40 cans, dos cales se deron en adopción posteriormente 28.
O mesmo sucede cos gatos posto que, debido á non identificación dos propietarios dos mesmos, foron recollidos 49 gatos dos cales se deron posteriormente en adopción 34. O Concello de Boiro destina unha media de 120.000 euros anuais para a xestión de animais.
Con esta campaña de concienciación o Concello de Boiro o que busca é “inculcar a importancia de coidar ás mascotas tal e como indica a normativa, correctamente identificadas e respectando as normas de convivencia veciñal”.
