A Asociación Boirense de Empresas (ABE) inaugura este luns 22 de decembro o seu gran Parque Infantil de Nadal, o parque Boiro, o corazón do Nadal, que estará operativo nas datas 22 e 23 de decembro e 2 e 3 de xaneiro, en horario de 16:30 a 20:30 horas, no Polideportivo da Cachada. Segundo informou a ABE, o parque está deseñado para ofrecer á veciñanza e aos visitantes “unha experiencia completa e máxica destas datas, combinando diversión, creatividade e gastronomía para toda a familia”.
Entre as actividades destacadas, atópanse as seguintes:
-Inchábeis e zona infantil con xogos para nenos e nenas.
-Música e photocall para fotos divertidas.
-Caixa de correos real con mesas para escribir e decorar cartas; todas as cartas participarán no sorteo de 3 festas de aniversario valoradas en 100 € cada unha.
-Obradoiros creativos e artísticos, impartidos por entidades locais como AGADEA, Cruz Vermella e Amicos.
-Degustacións de flocos de millo, chocolatada e doces.
-Recepción de Papá Noel ás crianzas de Boiro
O acceso ao parque e á maioría das actividades é libre e gratuíto. Só se require convite (que se recolle nos comercios asociados á ABE ou no punto de información) para participar nas degustacións e acceder aos inchábeis.
Ademais, no parque os visitantes poden cambiar os seus tíckets ou facturas de compra nos comercios asociados por rifas para o sorteo de 3.000 € en vales de compra e, de xeito inmediato, recibir agasallos directos como calendarios de parede e a bolsa oficial da campaña.
Actividades especiais por días:
· Luns 22 de decembro
16:30 h: Inauguración do parque.
17:00 – 18:00 h: Obradoiro interxeracional de decoración de Nadal (AGADEA) – acceso libre.
18:30 h: Chocolatada (con invitación dos comercios asociados).
Martes 23 de decembro
17:00 – 18:30 h: Obradoiro de creación de chapas de Nadal (Cruz Vermella)
17:30 – 20:30 h: Gran recepción de Papá Noel con agasallo de conos con lambonadas e sesión de fotos – acceso libre.
Venres 2 de xaneiro
17:00 – 18:30 h: Obradoiro infantil Decora unha bola para a túa árbore de Nadal (Amicos)
18:30 – 20:00 h: Obradoiro Expresarte, reutilizando materiais de refugallo para arte (Amicos)
Sábado 3 de xaneiro
Gran festa con DJ e animación.
21:00 h: Sorteo presencial de 3.000 € en vales de compra.
Apertura do Buzón Real e sorteo de 3 festas de aniversario (300 € en total).
A ABE lembra que no propio parque os clientes poden cambiar os tíckets ou facturas de compra por rifas para participar no sorteo presencial de 3.000€. Ademais, debido á alta demanda, a ABE habilitará un novo punto de troco nas súas oficinas os días 23, 26, 29 e 30, en horario de 11:30 a 13:30 h, para facilitar este trámite a todas as persoas clientes.
“Este evento pretende consolidarse como unha das citas máis importantes do Nadal en Boiro, promovendo o comercio local e a participación familiar nunha programación inclusiva, divertida e segura”, sinalaron dende ABE.
Máis información na web da asociación.
