O alcalde de Boiro, José Ramón Romero, e o presidente da Asociación Boirense de Empresas (ABE), Daniel García Dosil, asinaron o convenio anual para levar a cabo actividades de promoción económica e comercial co que renovan a súa colaboración.
O Concello de Boiro destina 30.000 euros para o impulso da actividade comercial no municipio co desenvolvemento de actividades e campañas dende a Asociación Boirense de Empresas para favorecer o comercio local. Xunto co concelleiro de Comercio, Formación e Emprego, Roberto Lojo, analizaron tamén as principais liñas de traballo a desenvolver durante os vindeiros meses e a campaña de Nadal.
Ademais das campañas específicas que a ABE realiza ao longo do ano, conta con persoal administrativo e técnico dedicado ao asesoramento ao emprendemento e á actividade empresarial. Este convenio de colaboración forma parte das accións que o Concello de Boiro leva a cabo en materia de promoción económica, do empresariado e emprendemento para fomentar o emprego no municipio.
