A Asociación Boirense de Empresas (ABE) vén de dar a coñecer a gañadora do sorteo organizado con motivo da campaña especial do Magosto de Boiro 2025, que se desenvolveu durante a fin de semana do 15 e 16 de novembro.
A premiada foi Ana Laiño, quen participou cun tícket correspondente a unha compra realizada no Café Bar Castelao. Como gañadora, recibirá un lote especial de produtos do Magosto, composto por viño, castañas, licor café e outros artigos típicos proporcionados pola Praza de Abastos de Boiro.
A campaña, impulsada pola Asociación Boirense de Empresas en colaboración co Magosto promovido pola Cruz Vermella de Boiro e o Concello, buscaba “dinamizar as compras locais coincidindo cunha xornada festiva que encheu as rúas de actividade”.
Durante a fin de semana rexistráronse un total de 363 tíckets de compra, unha cifra que amosa a boa acollida da proposta e o compromiso da veciñanza co comercio de proximidade. Ademais, a coincidente vixencia dos Bonos MercaNaVila supuxo un incentivo adicional para acudir aos máis de 200 establecementos asociados á ABE.
Dende a Asociación Boirense de Empresas agradeceron “a participación de todas as persoas consumidoras e a implicación dos negocios asociados, que continúan a fortalecer o tecido comercial da vila”.
