O persoal laboral do Concello de Muros comezará unha campaña de mobilizacións para denunciar, nas súas palabras, “a discriminación salarial que padece desde hai anos”. Segundo informou Comisións Obreiras (CCOO), a primeira acción será unha concentración diante da Casa Consistorial o vindeiro xoves, 30 de outubro, coincidindo coa sesión plenaria da Corporación. Indica o sindicato que “tras oito anos de promesas incumpridas por tres gobernos municipais de distinta cor política, o persoal decidiu emprender estas medidas de presión”. As concentracións repetiranse os últimos xoves de cada mes, coincidindo cos respectivos plenos.
O conflito, indica Comisións Obreiras, “ten a súa orixe na desigualdade retributiva entre traballadores e traballadoras do Concello e na incapacidade dos sucesivos gobernos locais para aprobar unha relación de postos de traballo (RPT) que estableza valoracións xustas e coherentes”.
Engaden que a día de hoxe “21 postos de distintos grupos profesionais —aproximadamente un terzo do persoal laboral— non perciben os complementos de destino e específico que recibe o resto” e que ademais “hai 15 traballadores e traballadoras que teñen salarios tan baixos que o Concello debe aplicar un complemento SMI para que cheguen ao salario mínimo interprofesional fixado pola lei”.
O comité de empresa, presidido por CCOO, reclama dos grupos políticos municipais que elaboren e aproben uns orzamentos que inclúan as partidas necesarias para elaborar unha RPT “que poña fin a unha inxustiza coñecida e prolongada no tempo”.
Ademais das mobilizacións, o comité de empresa denunciará a situación ante a Inspección de Traballo e non descarta emprender accións xudiciais, conclúe Comisións.
