O alcalde de Rianxo, Julián Bustelo, e a concelleira de Política Social, Ana Vidal, participaron este 24 de outubro na presentación da Guía de apoio ás persoas coidadoras elaborada pola organización AGADEA persoa persoas con alzhéimer, unha ferramenta de gran utilidade para as persoas coidadoras de outras con algún tipo de deterioro cognitivo.
O alcalde e a concelleira lembraron que en Rianxo está en funcionamento un centro terapéutico para a atención de persoas maiores con deterioro congnitivo, así como diferentes grupos de envellecemento activo nas parroquias. “Estes recursos teñen como finalidade principal frear o desenvolvemento de posibles enfermidades neurodexenerativas e, de ser o caso, detectalas o antes posíbel”, sinalaron.
A guía, elaborada por un equipo interdisciplinar de AGADEA, recolle recomendacións prácticas, estratexias de autocoidado, claves para a comunicación e o manexo de situacións complexas derivadas das demencias, así como recursos e dereitos que as persoas coidadoras deben coñecer.
Desde AGADEA destacouse a importancia de continuar fortalecendo os vínculos co persoal sanitario da comarca do Barbanza, favorecendo a coordinación e a sensibilización arredor das demencias e do apoio necesario ás persoas que coidan.
