O alcalde de Rianxo, Julián Bustelo, e a concelleira de Política Social, Ana Vidal, fixeron entrega hoxe á organización SOGAPS (Solidariedade Galega co Pobo Saharauí) dos máis de 1.500€ recadados na andaina solidaria celebrada hai unhas semanas no concello rianxeiro.
Estes fondos permiten, entre outras cousas, financiar o programa Vacacións en Paz promovido pola dita entidade humanitaria, un programa que permite que moitos nenos e nenas pasen o verán afastados das temperaturas que nestes meses se acadan nos campos de refuxiados do deserto.
Lembrar tamén que o Concello de Rianxo colaborou estes días coa recollida solidaria de medicamentos e material sanitario (medicación oral de uso común como paracetamol, ibuprofeno, amoxicilina, antiestamínicos ou vitaminas), inxectábel e pomadas que organizou SOGAPS.
Os lugares de recollida foron a Casa do Concello, a piscina municipal, o CEP Brea Segade (en horario do campamento) e as farmacias de Rianxo.
