Co mes de outubro empezaron os distintos obradoiros que conforman o Programa de Dinamización e Promoción Social das Persoas Maiores que pon en marcha o Concello de Ribeira no curso 2026-2027; unha edición que” conta cos mellores datos ata o de agora, pois hai máis de 500 persoas inscritas”, informaron fontes do Consistorio, engadindo que estamos ante un programa que se descentraliza da cidade para levalo tamén ás parroquias cun total de oito obradoiros dende o 5 de outubro de 2026 ata o 15 de xuño de 2027: estimulación da mente-memoria, enriquecemento educativo, lingua e cultura galega, conversa en inglés, artes plásticas, taek-health, ximnasia adaptada e cantares e tradicións. A disciplina que esperta maior interese é a ximnasia adaptada (358 inscritos), seguida de memoria (251) e taek-health (188).
O concelleiro de Servizos Sociais, Vicente Mariño, desprazouse nestes días, xunto a outros edís, ata os distintos espazos onde se imparten as clases para dar a benvida aos veciños e veciñas asistentes. “Neste curso contamos cuns datos excepcionais, pois temos máis de medio milleiro de veciños e veciñas participantes. A maioría son mulleres, con 464 inscritas, pero tamén conseguimos chegar nesta ano a máis homes, con 54 anotados. E, dada a demanda, ampliamos a ximnasia adaptada para impartila tamén en Oleiros e Olveira e creamos un novo grupo de memoria en Ribeira”, destaca o edil. Mariño quixo lembrar tamén as principais novidades como ser a de maior duración de tódalas edicións previas, incrementar 15 minutos a duración de cada grupo das conversas en inglés, o taek-health como programa pioneiro a nivel nacional e a incorporación de cantares e tradicións.
As persoas destinatarias son aquelas pensionistas do Sistema da Seguridade Social con 60 anos cumpridos ou máis idade, e empadroadas en Ribeira.Os obxectivos específicos do programa son promover o envellecemento activo; evitar o sedentarismo, illamento e pasividade; fomentar a participación de grupo e relacións interpersoais da poboación maior de 60 anos do municipio; ampliar a oferta de ocupación do tempo de ocio; aumentar a frecuencia das actividades
positivas co colectivo de maiores; motivar as persoas maiores en accións comunitarias; e mellorar a calidade de vida da veciñanza.
