O Concello de Muros recibiu este mércores 22 de agosto ás familias que acollen crianzas saharauís ao abeiro do programa Vacacións en Paz, impulsado pola SOGAPS de Muros. No acto participaron a alcaldesa, María Lago, e o concelleiro de Servizos Sociais, Mario Martínez, que fixeron entrega de agasallos elaborados pola asociación inclusiva da contorna muradá ADISBISMUR e de material escolar destinado aos campamentos de Tindouf (Arxelia).
O programa, con décadas de traxectoria en Galiza e milleiros de acollementos, procura mellorar a saúde das crianzas e garantirlles un verán afastado das temperaturas extremas do deserto alxerino, onde malviven milleiros de persoas refuxiadas desde hai case medio século.
Desde o Goberno local de Muros subliñaron o seu “compromiso coa causa saharauí” e “co dereito á autodeterminación dun pobo que continúa a sufrir a ocupación marroquí mentres o Estado español elude a súa responsabilidade histórica e política”, sinalaron.
