Este venres 2 de maio inaugurouse na praza da Vila de Sarria a feira Expocidades, a VIII Feira de Turismo do Eixo Atlántico. Vinte e oito concellos e entidades de Galicia e do norte de Portugal reuniranse entre este venres e o domingo, 2 de maio, para amosar o mellor da súa oferta cultural, patrimonial e gastronómica. Durante a fin de semana haberá visitas guiadas, catas de viños, degustacións gastronómicas, concertos, exposicións, obradoiros infantís e exhibicións de artesanía en vivo, entre outras actividades. Ribeira atópase entre as localidades con presenza na feira.
O segundo tenente de alcalde de Ribeira, Francisco Suárez-Puerta, informou que este tipo de formato de feira “promove un turismo de proximidade, familiar, gastronómico, cultural e de calidade”. Suárez-Puerta subscribiu as palabras de Xoán V. Mao, secretario xeral do Eixo Atlántico na inauguración da feira, na que salientou que “precisamos un turismo gourmet e de calidade que veña a Ribeira a gozar; o que non precisamos son macrofábricas coma a de Altri que poden acabar coa nosa ría e con isto o noso sistema de vida”.
Á xente que se achega ao stand de Ribeira “estáselle entrega de material promocional, sobre todo das nosas festas gastronómicas; do percebe, do polbo e da navalla polas cales preguntan polas datas”. O concelleiro sinalou que “o obxectivo estase cumprindo e que imos ter moita xente que vai vir a gozar das nosas festas gastronómicas grazas a que estamos presentes neste tipo de escaparates que nos permiten posicionar a Ribeira turisticamente como un produto de alto nivel”.
Sarria preparou un extenso programa para animar a fin de semana. Cada día da feira estará dedicado a un ámbito territorial distinto: o venres a Galicia, o sábado a Europa e o domingo a Portugal. Entre os actos destacados están tres visitas guiadas sobre o Camiño Francés, as antigüidades locais e a vida de Matías López, empresario e chocolateiro de Sarria, dirixidas por expertas como Silvia Mondelo. Tamén haberá unha exclusiva cata de viños galegos e portugueses para un grupo reducido de asistentes. A música terá un papel protagonista, con concertos de diversos estilos, incluído un tributo a Abba, a actuación da banda local Louband e o peche a cargo do grupo sarrián Clarisaxos. Para os máis pequenos organizaranse obradoiros de chocolate, maxia e creación de instrumentos con materiais naturais, mentres que os adultos poderán participar nun obradoiro de baile tradicional galego.
O domingo 4 de maio, Sarria renderá homenaxe a Portugal cunha sesión vermú de fados a cargo da cantante Iria Estévez. Ademais, na mesma fin de semana Sarria acollerá eventos deportivos como a Pretorian Race e un rally de coches clásicos organizado polo club Clásic@s Sarria.
Expocidades é unha iniciativa promovida polo Eixo Atlántico que fomenta o turismo de proximidade e o intercambio cultural entre Galicia e o norte de Portugal. Durante tres días, Sarria converterase nun escaparate da riqueza e diversidade do territorio atlántico.
