Este mércores 2 de abril conmemórase o Día Mundial de Concienciación sobre o Autismo, unha data que ten como obxectivo dar visibilidade na sociedade ás persoas con trastorno do espectro do autismo (TEA) e promover súa participación social en igualdade de condicións. O Concello de Rianxo ten un amplo programa de actividades para celebrar esta xornada. Para comezar, este mércores celebrarase no Pazo de Rianxiño, ás 17.00 horas, un acto institucional e a lectura dun manifesto co que reivindicar a plena integración das persoas con TEA. De xeito complementario, o equipo do Concello iluminará a fachada da Casa Consistorial en sinal de solidariedade.
Ademais, este xoves 3, ás 18.30 horas, desenvolverase un relatorio de Sandra Fernández (A ansiedade no autismo) no Pazo do Martelo e o venres 4 volverán as charlas ao Pazo de Martelo con A sexualidade e o autismo, a cargo de ASPERGA.
Estas actividades formativas e divulgativas irán orientadas aos clubs deportivos do municipio, entidades asociativas e ao conxunto da veciñanza.
O domingo día 6 de abril o municipio rianxeiro acollerá a II Andaina Solidaria da Asociación de Trastornos do Espectro Autista do Barbanza – BarbanTEA. Organiza o Servizo de Deportes do Concello de Rianxo.
Dende o Concello de Rianxo tamén recordan que podemos coñecer máis detalles sobre esta iniciativa visitando o portal web www.diamundialautismo.com ou contactando coa Federación Autismo Galicia a través de info@autismogalicia.org ou do 981 589 365.
