O Concello de Ribeira reuniuse co profesorado e o alumnado do Obradoiro de Carpintaría da UCA para achegarlle o seu agradecemento de Nadal, ao tempo que salientou o importante traballo de integración que está a desenvolver no termo municipal e no Barbanza. “Podemos dicir que o Obradoiro é unha familia de carpinteiros que goza co seu traballo e que poden botar peito coa variedade de traballos de calidade que fan para toda a comunidade”, sinalou o equipo do Concello. O agradecemento feito polo Goberno local foi realizado polo rexedor, Luís Pérez Barral, o tenente de alcalde, Vicente Mariño, o concelleiro de Sanidade, Juan Luis Furones, o director da UCA, Jesús Cartelle, e o mestre carpinteiro, Manolo Casais.
Na recepción feita transmitíuselles a todos os compoñentes do obradoiro os agradecementos e o orgullo do Goberno e da veciñanza polo traballo realizado neste ano que remata. O alcalde destacou o traballo que os usuarios desenvolven no ámbito do mantemento de infraestruturas en madeira, a colaboración que prestan na instalación dos beléns de Nadal ou a rehabilitación da aldea de Sálvora. “Prestades un servizo á comunidade que é esencial e que moitas veces pasa desapercibido, por iso agradecémosvos publicamente todo o voso traballo e esforzo”, engadiu. Ao remate fíxose a entrega duns aguinaldos de Nadal.
