O Concello de Boiro sacou a licitación as obras para a mellora dos accesos e servizos á praia de Mañóns. O proxecto de execución da actuación ascende aos 42.514,26 euros e vaise levar a cabo mediante o Plan de Obras e Servizos (POS+) da Deputación da Coruña.
A finalidade da obra que se pretende acometer é “mellorar o firme para xerar un percorrido accesíbel e seguro á praia de Mañóns, así como canalizar as pluviais eliminando o foxo aberto e que, nestes momentos, xera problemas de seguridade viaria”.
Así, vaise actuar na renovación do pavimento asfáltico da vía de acceso, dunha lonxitude de 180 metros e un ancho de 8 metros.
O proxecto contempla tamén crear beiras de 5 de ancho a cada lado da vía, de chan compacto de area- cemento, para facilitar o estacionamento e accesibilidade á praia. Xunto cos pavimentos vaise realizar a canalización de pluviais que percorren pola beira oeste, para mellorar a seguridade de uso da vía.
Os pregos para a licitación están dispoñíbeis para a súa consulta na Plataforma de Contratación do Sector Público e as empresas interesadas poderán presentar as súas ofertas ata o 16 de abril.