O alcalde de Rianxo recordou os actos preparados para nomear fillo adoptivo do concello ao profesor, escritor e historiador Xesús Costa Rodil. Tal e como destacou o rexedor, Julián Bustelo, “ademais de polo seu labor a prol da memoria histórica, don Xesús está presente no recordo dos rianxeiros e rianxeiras pola súa xenerosidade, bondade e amabilidade como docente, méritos que fan que nos sintamos orgullosos e orgullosas de que sexa fillo adoptivo do noso pobo”.
Os actos conmemorativos programados desenvolveranse os días 10 e 11 de novembro, venres e sábado. O primeiro día o salón de actos do Auditorio de Rianxo acollerá a presentación de Versos de Senectude, póstumo de Xesús Costa Rodil. Será ás 20.30 horas do venres 10. Ao día seguinte celebrarase un acto de solemne e público de nomeamento de fillo adoptivo de Rianxo a Xesús Costa Rodil. Será ás 12.00 horas na Sala Arcos Moldes do Auditorio Municipal.
Biografía (fonte: Galipedia)
Xesús Costa Rodil, nado en Espiñeirido (Cervo) en 1944 e finado en Rianxo o 7 de agosto de 2018, foi un profesor e escritor galego.
Mestre e licenciado en Filosofía e Letras, exerceu a docencia durante máis de corenta anos no IES Félix Muriel de Rianxo, vila á que dedicou gran parte do seu labor de investigación histórica.
Na súa produción destaca Rianxo no Antigo Réxime. Economía e sociedade nunha vila mariñeira do señorío arcebispal de Santiago (2001), obra na que fixo unha historia da súa vila de adopción ao longo de varios séculos. Centrou logo o seu interese historiográfico xa no século XX, máis concretamente na época republicana, na guerra civil e na represión franquista, do que son testemuña traballos como Rianxo na II República: firme apoio ó Estatuto de Autonomía (2003) e Rianxo na guerra civil: campo de concentración de prisioneiros de guerra (1937-1939), escrito en colaboración con Xosé Comoxo e Xesús Santos Suárez, autores cos que tamén asinou o traballo Rianxo no centenario do nacemento de Manolo Rodríguez Castelao (2005).
Tamén é autor de Galiza na guerra civil. Campos de concentración de Muros, Padrón, A Pobra e Rianxo (2007), en colaboración con Xesús Santos, con quen realizou ademais un ensaio sobre a represión no maxisterio: De Padrón a Muros. A represión educativa e cultural (1936-1950) (2010). A guerra é tamén o eixo do seu relato Bandeiras de liberdade ó nacente (2006).
