Os municipios de Ribeira, Rianxo, A Pobra do Caramiñal e Boiro son, por este orde, os que con maior certeza corren o risco de reducir a produción conserveira na comarca do Barbanza, de se manter o incremento rexistrado no prezo do aceite utilizado no produto envasado e que, por término medio, significa para o consumidor un aumento de máis do 50% na botella de 75 cl.
Ribeira, seguido de Rianxo, é o concello con maior número de industrias conserveiras da comarca, cun mínimo de 8 en produción, seguido de Rianxo, con 5 e con 4 cada en seu, A Pobra e Boiro. Hai algunha outra fabrica conserveira nos municipios sinalados e tamén no resto da comarca barbanzana, e mesmo algunha delas fechada. Pero o temor está centrado, agora, en como vai asimilar o sector os incrementos experimentados (se é que pode facelo). A este problema súmase a escaseza de determinadas especies de peixe e marisco (sardiña, lura, ameixa e xarda, especialmente) situación extensiva a outros lugares de Galicia, especialmente nas Rías Baixas.
Se ben o aumento de prezos do aceite embotellado pode non ter correspondencia co supostamente almacenado pola industria conserveira, as queixas neste senso do propio sector xa se recollen por distintos medios de comunicación como, por exemplo, La Voz de Galicia, que se refire a elas con titulares ben expresivos nos que se especifica que o aceite está a ser máis caro que o peixe que se envasa. Informacións que non resultan moi tranquilizadoras para os traballadores -inmensa maioría man de obra feminina- en moitos casos fixos doscontínuos que albiscan un futuro pouco agradable, de confirmarse eses prognósticos.
