A pesar das numerosas normas e disposicións legais, aprobadas, para suspender os desaloxos domiciliarios de familias vulnerábeis, estes continúanse sucedendo. Un claro exemplo foi este mércores nunha localidade do Barbanza, concretamente en Boiro. Unha familia humilde e en risco quedou na rúa, e ademais sen que fora garantida unha alternativa habitacional, por parte dun Xulgado de Primeira Instancia e Instrución.
Os xuíces, ademais de ter a obriga de aplicar as leis e demais normas lexislativas, teñen que desenvolver o sentido da proporcionalidade e da valoración do posible dano ocasionado. Aquí, coñecendo a situación actual de vulnerabilidade da familia, que consta no Informe Social dos Servizos Sociais municipais, así como a presunta situación de padecer algún tipo de patoloxía invalidante por parte dalgún membro da unidade familiar, non obstante o Tribunal de Xustiza decide lesionar os dereitos da parte máis débil e indefensa, a familia, e beneficiar ao fondo de investimento que se fixo coa propiedade, como consecuencia dunha estafa empresarial.
As leis, reais decretos e demais disposicións regulamentarias prohiben un desafiuzamento da vivenda habitual a persoas e familias vulnerábeis sen a garantía dunha alternativa habitacional. Desgraciadamente, son moitas as ocasións en que se violan e vulneran estes Dereitos Fundamentais de todos os cidadáns por culpa da falta de vontade política da Xunta de Galicia para dispoñer dun número importante de vivendas e poder así garantir o realoxamento das centenares de familias que se ven afectadas por procedementos xudiciais sobre execucións hipotecarias, falta de pagamentos de renda de alugueiros ou desaloxos en precario.
