O Bloque Nacionalista de Ribeira mostrou o seu apoio ao profesorado do Conservatorio encargado da Escola Municipal de Música que, segundo indica a agrupación, non vai ter continuidade profesional no seu labor. En palabras do BNG, trátase dun “procedemento irregular” do Goberno local.
Así o cualificaron o portavoz do BNG Luís Pérez Barral e a concelleira Cruz Rivadulla Márquez, explicando que “comparecemos para desmentir declaracións do rexedor que argumentaba na falta de aprobación dos Orzamentos de 2022 a necesidade de prescindir dese persoal“. E engadiron: “Aínda que se tiveran aprobado as contas do 2022, a día de hoxe estarían en prazo de exposición pública e, polo tanto, non estarían en vigor”.
Pérez Barral cualificou o asunto como de “extrema gravidade” pois “supón pasar tódalas liñas vermellas, ao chegar o alcalde ao punto de prescindir de traballadores e traballadoras municipais co obxectivo de danar a imaxe dos grupos políticos que non aceptamos as súas chantaxes”.
Desde o BNG piden “a rectificación desta decisión” ao entender que o persoal público que presta servizos tan básicos para a poboación como o da Escola de Música -destinada á rapazada de 3 a 7 anos- “non pode sufrir o castigo dun alcalde incapaz de dialogar e chegar a acordos”.
Os nacionalistas aseguran que “a lexislación garante a prestación dos servizos públicos e o pagamento das retribucións do persoal municipal”, polo que advirten “se o Goberno local opta por atacar ao persoal municipal e deteriorar a calidade dos servizos públicos prexudicando á veciñanza, o BNG actuará en consecuencia”.
E engadiron: “Se aceptamos a falacia de que non hai cartos para pagar ao persoal do Concello que presta servizos públicos para a veciñanza, tampouco pode habelos para pagar os 55.000 euros anuais que cobra o alcalde, os 70.000 euros que cobran os dous tenentes de alcalde ou os 25.800 doutra concelleira do Partido Popular”.
Barral finalizou recordando que seguen coa “man tendida para impulsar acordos que sexan positivos para a veciñanza” pero para iso aclaran “que o Goberno debe cambiar de actitude e estar disposto a dialogar”.
