O Concello de Boiro informa do remate, este venres 7 de xaneiro, das actividades do campamento de conciliación impulsado nestas festas polo Executivo local a través das áreas de Cultura e Educación. A concelleira de Cultura e Educación, María Outeiral, e o concelleiro Marcos Fajardo, aproveitaron unha visita que os nenos e nenas participantes fixeron ao Concello, como parte da axenda do campamento, para conversar con eles.
A actividade estivo destinada a nenos e nenas de entre 3 e 12 anos co obxectivo de facilitar ás familias “un recurso de conciliación con horarios flexíbeis axustado ás súas necesidades, así como ofrecer unha alternativa lúdica, formativa e integradora de ocio e tempo libre aos nenos e nenas participantes”.
As accións do campamento desenvolvéronse o días 22, 23, 27, 28, 29 e 30 de decembro e os días 3, 4, 5 e 7 de xaneiro, en horario de 8.00 a 15.00 horas, adaptado ás necesidades específicas das familias para a entrada e saída.
O desenvolvemento do programa estivo baseado en técnicas de intervención participativas e activas mediante as que se “buscaba fomentar a creatividade e os valores con actividades planificadas segundo as idades e as necesidades individuais”, en palabras do Concello.
