A Concellería de Educación do Concello de Boiro publicou a oferta formativa para as aulas de educación de adultos relativas ao curso 2021-2022. O programa formativo está destinado a persoas maiores de 18 anos e o prazo de inscrición pode facerse a partir do 10 de setembro a través do rexistro xeral ou sede electrónica do Concello de Boiro.
As aulas de ensino para persoas adultas están destinadas a maiores de 18 anos que non posúen o título da ESO e ofrecen a posibilidade de adquirir, actualizar ou complementar os coñecementos e aptitudes do alumnado para o seu desenvolvemento persoal e profesional. Entre os obxectivos específicos destas aulas están os de “adquirir e actualizar a formación básica, mellorar a cualificación profesional, adquirir novos conceptos, técnicas e habilidades para unha adaptación ao mundo laboral”.
A Aula de Educación para Persoas Adultas do Concello de Boiro está adscrita ao IES San Clemente de Santiago de Compostela e o profesorado desprázase a Boiro nas avaliacións. En total ofértanse 50 prazas repartidas nos catro módulos (1º, 2º, 3º e 4º), podendo realizarse dous módulos en cada curso escolar. Cada un dos módulos consta de diversos ámbitos: científico- tecnolóxico (matemáticas, bioloxía, física), ámbito lingüístico (galego, castelán, inglés ou francés) e ámbito social.
Toda a información da educación para persoas adultas pode conseguirse na Casa da Cultura Ramón Martínez López de Boiro, chamando ao teléfono 981 84 84 25 ou no enderezo electrónico educación@boiro.gal. O prazo de presentación de solicitudes estará aberto entre o 10 e 27 de setembro e pode facerse a través do Rexistro Xeral do Concello de Boiro, aberto de luns a venres en horario de 9.00 a 13.30 horas, ou da sede electrónica dispoñíbel na web municipal.
