Volve o autocine a Ribeira este domingo cunha nova proxección de María Solinha

Ribeira non pechou na semana do 8 de marzo as actividades conmemorativas do Día Internacional da Muller e, de feito, este domingo celébrase unha nova actividade encadrada nesta importante reivindicación. Estamos a falar da segunda proxección, en formato autocine, da película María Solinha de Ignacio Vilar, ás 19.30 horas no aparcadoiro fronte ao CIFP Coroso (a primeira proxección foi o venres 12 de marzo).

A iniciativa, alén da orixinalidade intrínseca de ser unha proxección segura á que se pode acudir no vehículo de cada quen, vén co engadido extra de brindar ao público a oportunidade de degustar menús preparados en tres establecementos hostaleiros locais: Furancho Galician Food, Restaurante O Paseo e Restaurante D’Vicio.
As entradas para ver o filme (de balde) pódense reservar en www.autocine.gal en tanto que os menús pódense pedir con antelación nos referidos establecementos e recoller no propio recinto (excepto no caso de O Paseo, que está situado moi próximo ao lugar elixido para a proxección). As portas abriranse arredor das 18.30 horas.

Trátase dunha actividade cultural e de reivindicación hostaleira de Autocine.gal e o Concello de Ribeira.