A praza Alcalde Segundo Durán da Pobra do Caramiñal acollerá o vindeiro 27 de xuño unha nova edición da Choqueirada, en palabras do Concello “unha das celebracións máis emblemáticas e participativas do calendario festivo local”.
A programación arrancará ás 22.00 horas coa actuación da macrodisco EME Music xunto a Marcos Magán. Unha hora máis tarde será a quenda do grupo Rocking Girls, mentres que a partir da 01.00 horas a música continuará coa sesión de peche da propia EME Music.
Disfraces, ambiente festivo e ganas de pasalo ben volverán ser os ingredientes principais dunha cita que cada ano congrega a veciñanza e visitantes nunha noite marcada pola diversión e a convivencia.
A presentación da actividade contou coa presenza da concelleira de Cultura, Patricia Lojo, e do concelleiro de Mocidade Eloy Sobrido, quen animaron á cidadanía a participar nun evento que forma parte das tradicións máis arraigadas da vila.
Desde o Concello da Pobra do Caramiñal convídase a todas as persoas a sumarse a esta celebración, que converterá novamente o centro urbano nun espazo de encontro aberto a públicos de todas as idades.
