Rematan en Boiro as obras de redes de servizo e pavimentado na Boliña

O Concello de Boiro informou do remate das obras que se estaban a executar na estrada que une o núcleo da Boliña coa avenida da Constitución, dirixidas a dotar a zona de redes de servizo e facer melloras no pavimentado. A actuación, dun importe de 39.561’47 euros, executouse con cargo ao plan de Obras e Servizos da Deputación Provincial da Coruña.

Con estas actuación, que se levou a cabo nun tramo da estrada duns 185 metros lineais, ademais de mellorar a rede de pluviais e o abastecemento de auga potábel e renovar o pavimentado, dotouse a zona de espazo para peóns en ambas marxes da estrada e instalouse tamén un hidrante de incendios xa que na zona non había ningún preto.