En Porto do Son vanse acometer, a través das achegas da Deputación por medio do POS+2021 (Plan de Obras e Servizos), importantes proxectos que melloren as infraestruturas e os servizos do concello e, tamén, que contribúan a acelerar a recuperación unha vez que remate a situación crítica actual. Son un completo feixe de actuacións concretas a desenvolver en todos os recantos do termo municipal, por exemplo en Mantoño (Portosín), Esparrelle (Caamaño) ou Cans (Nebra), onde se destinarán ao saneamento 75.292 euros, 193.328 euros e 119.213 euros, respectivamente.
Tamén haberá traballos de pavimentado e pluviais en Camaño (93.000 euros) e iniciativas de humanización na contorna da igrexa de Baroña (152.059 euros) e na rúa Santa Irene, na vila do Son, cunha contía de 165.147 euros. Amais, acondicionarase a praia do Cruceiro, acometerase o inicio da rehabilitación do Outeiro Alto, ampliarase e optimizarase o parque infantil de Xuño, mellorarase a praza de Xerardo Díaz e incrementarase a rede de saneamento en Eiravedra e Beneso.
Previamente o Concello fixo saber que os 162.801 euros dispoñíbeis para gastos sociais e extraordinarios da COVID (Plan Único da Deputación) destinaríanse a iniciativas como reforzar o persoal adscrito aos servizos sociais, axudar ás familias na escolarización dos seus fillos e na adquisición de material informático, e, tamén, prestar servizo de atención a domicilio na modalidade de dependencia.