O Concello de Porto do Son convocou esta tempada a todos os colexios de Infantil e Primaria do municipio para festexar a chegada da primavera. En concreto, a Concellería de Medio Ambiente organizou un Concurso de Maios aberto a todos os CEIP e no que participaron finalmente o CEIP Santa Irene de Porto do Son, o CEIP Campanario de Baroña e o CEIP Portosín. Este martes 30 inaugurouse finalmente a exposición aberta dos traballos presentados polos ditos centros educativos na fachada marítima de Porto do Son. O Concello compartiu nas redes imaxes da posta en marcha da mostra e ao longo dos vindeiros serán subidas as coplas compostas polo alumnado do CEIP Santa Irene e o CEIP Campanario. Nuns días a Concellería dará a coñecer a resolución do xurado.
