O Concello de Boiro deu a coñecer este 7 de xaneiro a resolución das concesións de axudas aos estudantes do curso 2020/2021 que convoca a Concellería de Educación. A listaxe definitiva de concesións vai estar dispoñíbel na web municipal.
O Concello de Boiro destina un total de 5.000 euros en axudas directas para gastos de transporte, alugueiro, manutención e outros gastos. Á convocatoria, destinada a alumnado que cursa estudos técnicos, medios ou superiores que non poidan ser cursados en ningún dos centros de ensino municipais, presentáronse un total de 110 solicitudes.
A concesión das bolsas realizouse mediante un réxime de concorrencia competitiva de acordo coa delegación de atribucións recollidas nas bases, entre as que se puntuaban o tipo de familia, a situación de emprego ou desemprego dos proxenitores, o lugar de residencia ou transporte empregado e o expediente académico.
Toda a información da convocatoria na Oficina Municipal de Información á Xuventude do Concello de Boiro, no enderezo electrónico omix@boiro.org, no teléfono 981 84 26 35 ou de xeito presencial no Centro Social de Boiro.
