Este mércores inaugúrase en Cabo a mostra pictórica Liñas en RGB

O Concello de Boiro vai inaugurar este mércores 30 unha mostra pictórica no Centro Social de Cabo de Cruz. A apertura oficial da exposición, que se poderá ver durante o mes de outubro, correrá a cargo da concelleira de Cultura, María Outeiral, quen a visitará este mércores ás 18.00 horas acompañada das e dos artistas participantes.

A colección pictórica leva por título Liñas en RGB e está organizada por un grupo de creadores da escola do artista de Taragoña Raúl Gil. Nela participan Antonio Queiruga, Belén Miguéns, Julia Gil, Jesús Suárez “Txuta”, María José Ferreira e Fran Gess, que cultivan o arte da pintura como unha inquietude persoal e decidiron levar a cabo esta mostra conxunta e dar a coñecer e incentivar esta modalidade.

RGB son as siglas do nome completo do pintor e mestre, ao que queren renderlle unha homenaxe con esta colección artística, e tamén é o acrónimo da paleta de cor (Red-Green-Blue).

A mostra poderá visitarse de luns a venres en horario de 10.00 a 14.00 horas e de martes a xoves tamén pola tarde, en horario de 16.00 a 19.00 horas.