O Concello de Porto do Son denunciou no seu Facebook un novo caso de vandalismo nos seus equipamentos públicos, logo dos que compartiu os días pasados relativos ao mobiliario urbano do parque infantil da vila, e que se suman tristemente a outros reiterados exemplos de incivismo nas infraestruturas dos nosos concellos, nas propiedades veciñais ou nos espazos naturais (máscaras antiCOVID inzando praias e lugares de importancia turística, contedores envorcados, restos de botellóns nas praias, nos parques infantís ou nos espazos de lecer, etc).
Desta volta, o vandalismo centrouse na embarcación de emerxencias do 112 do porto sonense, que apareceu pintada na proa, na popa e máis en diversas zonas da ponte de mando. Segundo informou o Concello respecto destes feitos, “baixo ningunha circunstancia imos permitir faltas de respecto contra ninguén, pero atentar desta maneira contra un equipo que o dá absolutamente todo por nós, é inconcibíbel”. E engade: “Non se trata dun xogo de nenos e non será tratado como tal”.
