No 110 aniversario dos asasinatos de 1916, a formación nacionalista vincula aquela loita agrarista coa defensa do territorio, a lingua, a vivenda e a soberanía.
O Bloque Nacionalista Galego (BNG) conmemorou este 12 de outubro en Porto do Son o 110 aniversario dos sucesos de Canto da Mura, lembrando a memoria das mártires de Nebra como «parte da historia real do País» e un referente para as mobilizacións sociais actuais en favor da terra, a lingua galega, a vivenda digna e a autodeterminación dos pobos.
No acto —que contou tamén coas intervencións do portavoz municipal sonense, Balbino González, e da militante de Galiza Nova, Mariña Castelao, ademais do peche musical a cargo de Mini Rivas—, a deputada no Parlamento de Galicia Rosana Pérez lembrou a traxedia de 1916, cando cinco mulleres e un home foron asasinados e máis de trinta persoas resultaron feridas mentres defendían o dereito á terra fronte aos abusos fiscais e caciquís. «Está lonxe no tempo, pero moi preto das nosas loitas de hoxe», asegurou Pérez, quen trazou un paralelismo directo co movemento popular que rexeitou a instalación da pasteira de Altri.
A deputada nacionalista fixo fincapé na problemática da vivenda e acusou directamente ao Partido Popular de pasividade institucional tras 17 anos ininterrompidos á fronte da Xunta de Galicia. Neste sentido, censurou que os populares fagan agora promesas contra os desafiuzamentos e a exclusión a nivel estatal cando «non moveron un dedo» durante década e media desde o Goberno autonómico, sinalando explicitamente a Alberto Núñez Feijóo como máxima autoridade durante a maior parte dese período.
Durante a súa intervención, a representante parlamentaria tamén puxo o foco na defensa do idioma galego fronte ás políticas da dereita e a posición do PSOE, condenou as agresións e conflitos internacionais —facendo unha mención explícita de solidariedade co pobo palestino— e reivindicou o dereito á soberanía e autodeterminación. Pérez concluíu rexeitando a «arma ideolóxica da hispanidade» fronte á necesidade de rescatar a memoria colectiva galega: «Somos porque outras foron».
