O Concello de Porto do Son denunciou no seu Facebook un novo caso de vandalismo no mobiliario urbano municipal. Segundo fai saber, mostrando os resultados da actividade incívica con imaxes ilustrativas, varios bancos da zona do Paseo do Cruceiro e máis do parque infantil de Porto do Son apareceron en “nefastas condicións”. O Concello lembra que non se trata dun accidente nin tampouco un “xogo de nenos”, e non será tratado como tal á hora de pescudar a autoría dos feitos.
Nas imaxes apréciase como foron arrancadas pola forza as táboas que serven de asento nos devanditos bancos, impedindo por completo o seu uso.
