O Concello de Boiro abre o prazo de preinscrición no Campamento Concilia de Verán Boiro 2020

O Concello de Boiro abre hoxe o prazo para a preinscrición no “Campamento Concila de Verán – Boiro 2020”, que se vai levar a cabo nos meses de xullo e agosto. O obxectivo desta actividade é fomentar a conciliación laboral e familiar durante as vacacións escolares. O prazo de preinscrición está xa aberto e toda a información e formularios están na web do Concello.
O campamento deste ano difire das edicións anteriores, xa que as medidas de seguridade restrinxen o número de prazas ofertadas e a selección de participantes vaise facer exclusivamente seguindo criterios de conciliación laboral. O Campamento Concilia está destinado a nenos e nenas de 6 a 12 anos, nados entre o 2008 e o 2014, e empadroados en Boiro.
As persoas interesadas en facer a preinscrición nesta actividade poden escoller entre dúas modalidades horarias, de 8.00 a 14.00 horas ou de 9.30 a 13.30 horas. As datas nas que se vai celebrar o campamento son, previsiblemente, do 6 de xullo ao 28 de agosto. A preinscrición non quere dicir que se celebre o campamento, xa que que o desenvolvemento do mesmo está suxeito ás directrices das autoridades sanitarias e ao cumprimento da normativa de seguridade para nenos e nenas.
As preinscricións deben facerse, desde hoxe e ata o vindeiro 23 de xuño, no Rexistro Xeral do Concello, en horario de luns a venres de 9.00 a 13.30 horas, ou a través da Sede Electrónica. Para a preinscrición é preciso entregar cubertos os formularios, que se poden encontrar na páxina web, e a certificación laboral dos pais, nais, ou titores/as legais para poder facer a
valoración.