Un incendio forestal, que tivo a súa orixe en tres focos, arrasou a pasada madrugada unhas 17 hectáreas de monte raso na zona da Granxa (Boiro). Foi pouco antes das dez e dez da noite do luns cando o equipo de vixilancia que ten despregado no monte da Curota a agrupación de voluntarios de Protección Civil da Pobra para a prevención de incendios forestais o que detectou que plantaran lume, polo que pasou aviso inmediato ao distrito forestal IV do Barbanza, con base en Noia, para que enviase medios á zona para participar na súa extinción. O forte vento do nordés fixo que as chamas se propagasen e estendesen en poucos minutos e dificultou os labores para sufocalo, quedando totalmente rematado ese lume ao redor das tres da madrugada coa intervención dun axente forestal, tres brigadas e tres motobombas. Á unha da madrugada, Protección Civil da Pobra recibiu unha chamada dun particular informando que plantaran lume en Lesón, polo que outro equipo desprazouse rapidamente a esa zona e conseguiu apagalo. Grazas a ese pronto aviso e á rápida intervención dos seus voluntarios, xunto cunha motobomba do distrito forestal comarcal e a patrulla de garda nocturna da Policía Local pobrense, este incendio quedou extinguido tamén ás tres da madrugada e logrouse que non arderan máis de 20 metros cadrados.
O Concello de Boiro proxecta un espazo para a mocidade no terceiro bloque das vivendas dos mestres de praia Xardín
O Concello de Boiro proxecta a rehabilitación integral por fases do terceiro bloque das vivendas dos mestres de praia Xardín para destinalo a Hub da mocidade. O alcalde, José Ramón Romero, e o concelleiro de Política Social, Raúl Treus, presentaron o proxecto. Segundo...
