As obras recoñecidas nos Premios Castelao de Banda Deseñada da Deputación da Coruña estanse a converter en realidades editoriais para ver, tocar, ler e, tamén, para axudarnos a superar os tempos de crise sanitaria. Así o confirmou este 6 de maio a entidade provincial, que informou que os galardóns que levan o nome do ilustre escritor e político rianxeiro na súa última edición, A Caza do coruñés Alberto Vázquez e Uxío do boirense Martín Romero (primeiro na categoría infantil) xa están nas librarías. A Deputación convídanos a mercalos para contribuír “a paliar os efectos da pandemia con banda deseñada galega de altísima calidade”. As novidades editoriais déronse a coñecer coincidindo coa apertura das librarías despois da fase máis severa do Decreto de Alarma.
Trátase, informa a Deputación, das dúas obras gañadoras da décimo cuarta edición do Premio Castelao de Banda Deseñada da Deputación da Coruña. O deputado de Cultura, Xurxo Couto, aproveitou a saída destes novos títulos para animar “a mercar nas librarías, espazos culturais de primeiro nivel que merecen o noso coidado e o noso apoio para superar a crise tan forte provocada pola COVID-19”.
Alberto Vázquez (A Coruña, 1980), é un dos máis recoñecidos autores do panorama galego, gañador, entre outros recoñecementos, de tres Premios Goya, por Birdboy, Psiconautas e Decorado. A súa nova obra, A Caza, goza, segundo o xurado, dun “grafismo moi sólido realizado coa técnica do sumi-e con tinta chinesa”.
Alberto Vázquez é director de animación, ilustrador e debuxante de cómics con libros editados en España, Francia, Italia, Brasil e Korea e ilustracións publicadas en medios de todo o mundo. Escribiu e dirixiu curtas como Birdboy, Sangre de Unicornio ou Decorado, baseadas nos seus cómics. Ademais dos tres premios Goyas, Alberto Vázquez obtivo máis de 100 premios internacionais, entre eles, o do Festival de Annecy, Chicago. Vén de rematar a súa primeira longametraxe de animación Psiconautas, os nenos esquecidos, do que é director, guionista, director de arte e baseado na súa novela gráfica do mesmo nome.
O boirense Martín Romero, gañador en infantil e xuvenil
Esta máis recente edición dos galardóns da Deputación incluíron a modalidade específica de infantil e xuvenil, que se estrou con Uxío de Martín Romero (Boiro, 1981) da que o xurado destacou o dominio das “posibilidades narrativas do medio, dun xeito diverso e interesante cun transfundo reflexivo de moito interese para o público infantil e xuvenil”. Tamén fixo referencia ao “uso humorístico, divertido, adaptado á idade, cunha filosofía sobre a vida dun xeito lixeiro e poético”.
Martín Romero é ilustrador, autor de cómics e director de animación, disciplinas que combina para desenvolver os máis diversos proxectos. Como ilustrador realiza traballos que van desde o ámbito publicitario até o editorial. Son obras súas os cómics Las fabulosas crónicas del ratón taciturno (2011), Episodios Lunares (2015) e La deuda (2017). Martín Romero acaba de dirixir a súa primeira curtametraxe de animación titulada La noche.
Altísima calidade
O deputado da área de Cultura, Xurxo Couto, salientou a “altísima calidade das obras gañadoras, con autores de xa moito recoñecemento”, engadindo que “non hai dúbida de que os dous libros do Premio Castelao están chamados a ser obras de referencia da banda deseñada galega”.
O xurado do XIV Premio Castelao de Banda Deseñada estivo composto por Gema Sesar, Kiko da Silva, Antonio Navarro Santalla e Albert Monteys, ademais da xefa do servizo de Cultura, Mercedes Fernández Albalat que actuou como secretaria e o deputado da área de Cultura, Xurxo Couto, en calidade de presidente. O premio está dotado con 6.500 euros ademais da publicación da obra que correu a cargo da propia Deputación da Coruña.
