A agrupación Boiro Novo vén de lanzar peticións específicas para ordenar, xestionar e optimizar o proceso de desescalada do Estado de Alarma no concello, poñendo o foco no lecer da veciñanza no exterior dos fogares. Entre as medidas achegadas para ser tidas en conta polo Concello figuran propostas xa presentadas na última xuntanza telemática mantida co Goberno local, como a elaboración dun plan de mobilidade cidadá que estipulase a apertura paulatina e ordenada de distintos espazos públicos (parques, paseos, areais…).
A proposta de Boiro Novo, lanzada “en consonancia co que fan outros concellos da nosa comarca”, consiste en “delimitar os espazos nos que se poida pasear ou realizar actividade física individual”. Isto, engade a agrupación, faríase “por sentidos de circulación co obxecto de minimizar o risco de que se crucen persoas a menos da distancia de seguridade establecida”.
Boiro Novo tamén propón facer recomendacións a cidadanía, “a ser posíbel de xeito específico segundo grupos de poboación e en base ás directrices das autoridades sanitarias, para extremar as medidas de seguridade cando a xente saia á rúa”.
En palabras do grupo, “tanto o plan de ordenación de mobilidade, como as medidas de seguridade aconselladas deben ser anunciadas non só nas redes sociais, senón tamén nos distintos taboleiros de anuncios do termo municipal, ou en lugares de visibilidade nas rúas máis concorridas”. Boiro Novo lembra que esta vindeira fin de semana xa estarán permitidos os paseos polo exterior e, ante a previsíbel elevada afluencia de cidadáns nas rúas, “solicitamos ao Goberno local que sexa previsor e se regulen canto antes os movementos dos viandantes”.
